歌手何雁詩與鄭俊弘今晚（7日）於酒店補擺喜酒，羅天宇反串做姊妹，與視後蔡思貝等一同擔任姊妹團，對於成員缺少了陳瀅與陳嘉寶，思貝透露陳瀅已從加拿大返港，不過正在隔離中，而懷孕中的嘉寶則會現身婚宴。

首任姊妹的天宇則表示去年於主人家結婚時，已想加入姊妹團，惟當時已超出人數。

他說：「舊年冇得做，不過都有幫手播嚇音樂，所以今年就畀我加入，雖然都系多咗人，但證明努力系有回報。（第一次做姊妹覺得點？）覺得多嘢做過兄弟，好多細節位，每日幾百個短訊。（會上台唱歌？）唔會，今晚流程都好Full，唱唔到。」

思貝同樣表示不會獻聲：「要唱就交畀天宇唱，佢唱歌好聽，我點歌就算。（緋聞男友胡鴻鈞都嚟，到時你先上台唱？）我負責伴舞啦！（咁你有咩做，頂酒？）唔會，我都唔飲得。其實見證咗何雁詩2次『結婚』，我學識點做一個Wedding Planner。（覺得結婚好麻煩？）今次都冇咩幫到手，因為要開工拍劇，好多會開唔到，但都唔擔心，因為好多嘢上年都做咗。」

何雁詩擺酒︱蔡思貝伴舞胡鴻鈞嚇親：要收番錢！

歌手胡鴻鈞（Hubert）專程來飲何雁詩、鄭俊弘喜酒，Hubert透露會在婚宴上唱歌，他笑說：「入行以嚟第一次唔收錢唱歌，因為同佢哋識咗好耐，所以唔講錢，我同一對新人講明下次結婚唔好再請我。」

Hubert坦言由《超級巨聲》認識阿詩，兩人識了10年，開心見證她步入人生新階段，他說：「知道佢哋兩個好多經歷、高高低低，依家終於有個團圓結局，希望佢哋快啲有人生下一步（生小朋友）。」

講到蔡思貝指今晚可以為他伴舞，他說：「嚇！真系㗎？咁真系要收番錢喎，收番何雁詩錢先得，安撫番我個心靈，咁驚嚇！（你唔系應該開心，點解驚嚇？）因為今日好多高層監製都喺度，陣間表演我要嚴陣以待，好似做嘢咁樣，唔使畀呢個驚喜我喎。（你好似好拒抗思貝？）唔系，唔系抗拒佢，我只系抗拒唔知嘅情況啫。（你咁講驚唔驚佢嬲？）唔驚，佢邊有咁小器。」

余詠珊招募新人唔用舊將想同樂易玲再合作：真係求之不得啦

前無線（TVB）助理總經理余詠珊（Sandy）與前星夢娛樂行政總裁何哲圖（Herman）今日到香港麗思卡爾頓酒店出席鄭俊弘（Fred） 與何雁詩 （Stephanie） 結婚一周年晚宴。

余詠珊早前成立製作公司，與香港開電視合作，今日她接受訪問時表示，兩間公司正常合作，只不過在成立之初需要的內容比較多，未來會娛樂節目為主要方向。余詠珊認為現時競爭大，前東家TVB及ViuTV都好有競爭力：「其實依家競爭好大，而OPENTV都係啱啱開始，而VIUTV真係好強勢，而TVB都唔係弱。我可以點樣行，一路諗，一路改。」不過她稱暫時未有聯絡舊將幫手：「我想諗清楚自己想做咩先，有啲節目可以再向前，招攬更多新人都唔定。」

余詠珊否認入主有線：「唔會、唔會、唔會！我同老公年紀都大，我同佢都覺得想全力做幫到香港嘅嘢。冇任何行政工作。」

她又說不是要對撼TVB：「我唔會咁諗，我覺得做好自己緊要啲，如果再唔努力，香港觀眾夜晚淨係睇 NETFLIX同迪士尼，咁香港都好慘，大家一齊努力，保住香港呢個地方。」之前有傳樂易玲想合作，余詠珊最希望可以成事：「暫時未有搵我，但我哋真係好熟，如果佢哋願意合作真係求之不得啦。」

TVB音樂節目《勁歌金曲》大縮水，在翡翠台只剩5分鐘，余詠珊就幫前東家解圍：「究竟要收視定係保護音樂，我以前都遇到呢個問題，我都唔知點算。」