鄭嘉穎唔諗拎視帝：畀啲未攞過嘅拎！

藝人鄭嘉穎於TVB台慶劇《星空下的仁醫》內與拍檔鍾嘉欣擦出火花，昨晚（15日）一集更交代嘉欣因診症時感染病毒，致BB胎死腹中，深愛她的嘉穎不想嘉欣自責一生，決定偷改醫療報告隱瞞兼承擔一切，期間二人先後失控痛哭，場面感人成網民熱話。

被贊演技出色的嘉穎，對於劇集受歡迎連聲多謝觀眾支持：「個假BB整得好迫真，直頭真到可以拍close up，道具組好犀利。（花咗5位數字喎！）依家物有所值啦。」

談到這場催淚戲，他說：「其實事前我同咗導演講，小弟1、2take OK，去到第3 take就真系『做』喇，我第一take嘅眼淚同感覺最真，會要求近鏡去拍。」

提到與嘉欣產生的化學作用，嘉穎表示：「大家都拍咗咁多年劇，佢都同我講至少演咗幾十部喇，我仲多個佢，對新人嚟講大家都系前輩，我慶幸遇上有經驗嘅對手。」

而昨晚劇情將戲味推高，似乎令他再奪視帝的機會再提高，嘉穎卻表示：「呢個我唔諗啦，比較希望畀啲未攞過嘅拎，可能會改變佢哋一生，好似Shaun（譚俊彥）演得好好，仲有《拳王》嘅張振朗，凈系睇佢操肌咁辛苦都值攞獎。大家鍾意套劇，同埋我嘅演出已經好開心，多謝大家支持。」

另外，今日活動上嘉穎走進小演員堆即刻大受歡迎，小朋友表現相當興奮。問到是否多了很多小朋友粉絲？他笑言：「我反而覺得依家多咗家長粉絲，大家好似真系覺得我醫病咁，如果有病記得去睇醫生，唔系搵我，哈哈！（TVB乘機再打你主意？）監製講過好似有人同佢提議開續集，你哋問佢啦，如果開到都要到時先算，睇嚇幾時通關再做決定。」

對於《星空下的仁醫》在香港受歡迎，內地「豆瓣」評分更高達9分的好成績，鄭超穎在接受訪問時就開心表示：「好多謝觀眾欣賞，團體嘅努力。」

還揚言因拍該劇令他對TVB眼前一亮：「我覺得TVB拍劇係同以前好大分別。無論道具、燈光好、攝影好，令我眼前一亮。（冇咁趕或跳拍？）係質量問題，每樣嘢都好講究。」

鄭嘉穎同時亦表示接拍劇集主因是同演員有關：「馬國明係一個原因，馬國明十幾年前合作過，鍾嘉欣未合作過，周家怡未合作過，俾我好多新鮮感。」還表示被劇本同角色吸引。

劇集大受好評有望在台慶奪得獎項，對於有望再衝擊視帝一獎，鄭嘉穎就看得好淡：「我覺得今年有好多新演員上緊嚟，張振朗等，我希望俾啲未攞過嘅攞，佢哋攞更有意義。」

他再三強調會投給一些未攞過視帝的人，還公開笑言叫黎耀祥不要再拿，事關對方已經拿過三次，非常好笑。

問道日前太太陳凱琳（Grace）拍片教整甜品，疑意外爆光了千呎豪宅。

當中被發現鞋架旁邊擺放了2隻Be@rbrick巨型模型，現時二手網市場已經炒到過$30,000，對於豪宅事件，鄭嘉穎就表示：「你哋唔好以為一定係我哋屋企先得架。拍就係我哋屋企咩，傻豬嚟架。」又揚言在玩具方面，兩個兒子都好鍾意玩車，消防車，巴士、校巴各款各式都有。

另外，鄭嘉穎曾講過不想兒子入行，望他們將來可以做專業人士對社會有貢獻。問道什麽類型專業人士，鄭嘉穎就揚言醫生是其中一個，但就對律師較為反感。

他說：「律師就唔好喇！我覺得律師永遠都係度同人嗌交同利益關係。我唔想個仔咁現實。做律師嗌嚟嗌去，雞毛蒜皮嗌到盡，除非是法援個啲就另計。」看來鄭嘉穎已經為兒子想了許多，果真做人父母不容易。